تقرير: الريح عصام جكسا
مع اقتراب شهر رمضان المعظم ترى كثيرًا من الناس يلتفون ويتحلقون حول باعة السبح.. كل يتخير ما يريده ويبحث عن ما يناسبه، ومن بعد يبدأ سباق الحسنات، وتعتبر تجارة السبح من الحرف التي تلقي رواجاً واسعاً في رمضان، ويزداد الإقبال على شرائها أكثر مما هو عليه في بقية الأيام، حيث يتسابق الآلاف عليها إيذاناً بانخراطهم في التسبيح طيلة الشهر الكريم ولا يقتصر الأمر على فئة معينة من الأشخاص بل يشملهم جميعًا فترى الصغار والشيوخ والشباب والنساء يحملونها ليسبحوا بحمد الله، دون أن يلتفتوا أو يعيروا اهتماماً لما حولهم..
تنتعش تجارة السبح فيقبل الكثيرون على شرائها، ويزيد الطلب عليها وينادى باعة السبح الذين انتشرو فى الأسواق .. علينا جاي السبحة بي مائة جنيه..
جلسنا مع مجموعة من الناس الذين وجدتهم يحملون السبحة فى وقت الظهيرة من رمضان ..
البداية كانت مع (محمد المنتصر ) الذي قال إن بعض الناس يعتبرون السبحة علامة للتقوى والبعض الآخر يعتبرونها وسيلة للذكر، وهناك فئة تالتة كمان بقت السبحة مكملة لمظهرهم، لكن ما عارف الناس بربطوها برمضان ليه؟ ما الواحد ممكن يسبح طول السنة.. والله أنا بعتقد إنو الموضوع دا ما أكتر من (شوفوني)..
وعبرت (عبير موسى) عن رأيها قائلة: أحسن الزول يشيلها وينشغل بيها فى التسبيح من ينشغل بحاجات تانية تجرِّح صيامو فهي بمثابة صمام أمان للشباب فى هذا الشهرالفضيل ولو أصلاً الواحد شايل السبحة ومتأكد إنو شالها عشان يذكر بيها ربنا أعتقد مافيها حاجة..
(2)
أما محمد المجتبى السر الذي التقيناه وهو يشتري سبحة فتحدث إلينا قائلاً: امتلك عشرات السبح واشترى باستمرار ما يعجبنى منها لا يهمني من أي الأنواع هي بقدر ما يهمني لونها وترتيبها فالسبحة تمثل لي الكثير.. أما عن شراء السبح بشهر رمضان فقال: والله أنا صدفة لقيتوني بشتريها فى رمضان.. ذكر الله دا كمان عندو شهر معين ؟!.
وينصح محمد المجتبي كافة الناس بحمل السبحة في كل مكان وفي أي زمان فهي تعين على كسب الثواب والحسنات..
(3)
داخل إحدى الحافلات وفى المرايا بالتحديد علق (صديق) عدداً من السبح فسألناه عن معنى ذلك فقال: أنا بعلق السبح دى كزينة لا أكتر ولا أقل.. وبرضو في بعض البيوت بنلقاها معلقة في الحيط كنوع من أنواع الديكور، والقضية ما عندها أي علاقة برمضان.. وأنا شخصياً عمري ما شلت لي سبحة سبحت بيها.. أصابعينى ديل عملوهم لشنو؟ وأضاف: يا ناس خافو الله المظاهر حتى فى التسبيح ؟؟ الله عارف البسبح من البضبح..
(4)
عمنا (حاج عباس) أحد الحرفيين الذين يمتهنون صناعة وبيع السبح تحدث قائلاً: السبحة في رمضان سوقها حار وبشتروها الناس من مختلف الأعمار وشايف الشباب الزمن دا قايمين فيها…
يشيل السبحة من يدى ولرقبتو طوالى والغريبة البنات بقوا بشتروا السبحة من لون اللبسة.. مرات بفكر أقول ليهم الكلام دا غلط لكن برجع وأقول (الما بهديهو الكريم تعبان)..
